លោកឧត្តមសេនីយ៍ទោ សិទ្ធិ ឡោះ ដឹកនាំកម្លាំងនគរបាលការពារសន្តិសុខសណ្តាប់ធ្នាប់ ជូនថ្នាក់ដឹកនាំ ក្នុងពិធីសម្ពោធដាក់ឲ្យប្រើប្រាស់ជាផ្លូវការ មជ្ឈមណ្ឌលសំចត និងស្តារនីតិសម្បទាជនរងគ្រោះប៉ោយប៉ែត
=========
បន្ទាយមានជ័យ: នៅព្រឹកថ្ងៃទី១៨ ខែធ្នូ ឆ្នាំ២០២៣នេះ លោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ បានអញ្ជើញចូលរួមពិធីសម្ពោធដាក់ឲ្យប្រើប្រាស់ជាផ្លូវការ មជ្ឈមណ្ឌលសំចត និងស្តារនីតិសម្បទាជនងាយរងគ្រោះប៉ោយប៉ែត នៅភូមិប្រជាធម្ម សង្កាត់ផ្សារកណ្តាល ក្រុងប៉ោយប៉ែត។
ពិធីសម្ភោធដាក់ដាក់ឱ្យប្រើប្រាស់មជ្ឈមណ្ឌលសំចត និងស្តារនីតិសម្បទាជនងាយរងគ្រោះប៉ោយប៉ែត ធ្វើឡើងក្រោមអធិបតីភាពដ៏ខ្ពង់ខ្ពស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិប្រយុទ្ធប្រឆាំងការជួញដូរមនុស្ស តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ចបានថ្លែងថា មជ្ឈមណ្ឌលសំចត និងស្តារនីតិសម្បទាសម្រាប់ជនរងគ្រោះ ជាជំនួយឥតសំណងរាជរដ្ឋាភិបាល នៃព្រះរាជាណាចក្រថៃ ចំនួនទឹកប្រាក់ ២,១៩៩,៩២០ ដុល្លារសហរដ្ឋអាមេរិក។ គម្រោងសាងសង់នេះមានរយៈពេល១ឆ្នាំ ចាប់ផ្ដើមសាងសង់នៅថ្ងៃទី១៥ ខែសីហា ឆ្នាំ២០២២ ដែលត្រូវបញ្ចប់នៅថ្ងៃទី១៧ ខែសីហា ឆ្នាំ២០២៣ ដែលមានទំហំផ្ទៃដីសរុប ៩,៧៦៨ ម៉ែត្រកការ៉ (បណ្តោយ១០១,៣៩ម ទទឹង៩៦.៣៤ម)។ ក្នុងនោះដែរមជ្ឈមណ្ឌល ក៏មានជំនាញវិជ្ជាជីវៈចំនួន៥ជំនាញ រួមមាន ៖ ជំនាញកាត់ដេរ, ជំនាញសាឡន, ជំនាញធ្វើម្ហូប/បង្អែម, ជំនាញអគ្គិសនី និងទឹក, ជំនាញម៉ាស៊ីនត្រជាក់។
ក្នុងឱកាសនោះលោកឧត្តមសេនីយ៍ទោ សិទ្ធិ ឡោះ ក៏បានដឹកនាំកម្លាំងចុះការពារសន្តិសុខ សណ្តាប់ធ្នាប់ រក្សាសុវត្ថិភាព កន្លែងប្រារព្ធពិធី និងសម្រួលចរាចរណ៍ ជូនថ្នាក់ដឹកនាំ ប្រតិភូជាតិ អន្តរជាតិ ឯកឧត្តម លោកជំទាវ លោក លោកស្រី មកពីតំណាងក្រសួង ស្ថាប័នពាក់ព័ន្ធ មន្ត្រីស្ថានទូតថៃ និងប្រជាពលរដ្ឋ ប្រកបទៅដោយសន្តិសុខ និងសណ្តាប់ធ្នាប់ល្អ៕
