លោកឧត្តមសេនីយ៍ទោ សិទ្ធិ ឡោះ បានដឹកនាំកិច្ចប្រជុំបូកសរុបលទ្ធផលការងារប្រចាំខែ កក្កដា លើកទិសដៅអនុវត្តបន្ត និងចែកលិខិតថ្លែងអំណរគុណ ដល់កងកម្លាំង ក្នុងការបំពេញការងារ 
បានល្អកន្លងមក
==========
បន្ទាយមានជ័យ: នៅព្រឹកថ្ងៃទី ២៨ ខែ កក្កដា ឆ្នាំ២០២៣នេះ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំខែ កក្កដា លើកទិសដៅអនុវត្តបន្ត និងចែកលិខិតថ្លែងអំណរគុណ ដល់កងកម្លាំង ដែលបានថែរក្សាការពារ សន្តិសុខ សុវត្ថិភាព លះបង់ពេលវេលា កំលាំងកាយចិត្ត សម្ភារៈ ថវិកា ក្នុងកិច្ចការពារសន្តិសុខ សណ្តាប់ធ្នាប់ សុវត្ថិភាពបានល្អក្នុងដំណើរការបោះឆ្នោតជ្រើតាំងតំណាងរាស្ត្រអាណត្តិកទី៧កន្លងទៅទទួលបាននូវការកោតសរសើរពីថ្នាក់ដឹកនាំគ្រប់លំដាប់ថ្នាក់ និងការពារបាននូវសន្តិសុខ សុវត្ថិភាព សណ្តាប់សង្គម ដោយបាននាំមកនូវសន្តិសុខល្អជូនបងប្អូនប្រជាពលរដ្ឋទូទាំងខេត្តបន្ទាយមានជ័យ និងក្នុងកិច្ចការពារសន្តិសុខ សណ្ដាប់ធ្នាប់ ក្នុងការប្រកួតកីឡាស៊ីហ្គេម និងកីឡាជនពិការប៉ារ៉ាហ្គេមកន្លងមក ។
ពិធីនេះមានការចូលរួមពី លោក លោកស្រី ឧត្តមសេនីយ៍ វរសេនីយ៍ ស្នងការរងទាំងអស់ លោក លោកស្រី វរសេនីយ៍ នាយការិយាល័យទាំងអស់ចំណុះស្នងការដ្ឋាន -លោក វរសេនីយ៍ អធិការ នៃអធិការដ្ឋាននគរបាល ក្រុង-ស្រុកទាំង៩ -លោក វរសេនីយ៍ មេបញ្ហាការ នៃវរសេនាតូចនគរបាលការពារព្រំដែនគោកទាំង៤ -លោក វរសេនីយ៍ អនុសេនីយ៍ នាយប៉ុស្តិ៍នគរបាលរដ្ឋបាលឃុំ/សង្កាត់ ទាំង៦៧ -លោក វរសេនីយ៍ អនុសេនីយ៍ នាយប៉ុស្តិ៍នរគរបាលការពារព្រំដែនគោកទាំង៣២។
លោកឧត្តមសេនីយ៍ទោ សិទ្ធិ ឡោះ បានថ្លែងអំណរគុណ កោតសរសើរនិងវាយតម្លៃខ្ពស់ចំពោះ លោក លោកស្រី ថ្នាក់ដឹកនាំគ្រប់ផ្នែកពាក់ព័ន្ធទាំងអស់ ដែលបានខិតខំប្រឹងប្រែងបំពេញការងារ តួនាទី ភារកិច្ចបានល្អតាមផែនការណ៍។ លោកឧត្តមសេនីយ៍ទោស្នងការ ក៏បានដាក់ចេញនូវផែនការសម្រាប់ខែបន្ទាប់ គឺ ១-ជម្រុញដល់កម្លាំងជំនាញ ការងារសន្តិសុខ បន្តយកចិត្តទុកដាក់ លើសកម្មភាពអសន្តិសុខ និងក្តាប់មុខសញ្ញាចាស់ថ្មី ២- រឹតបន្តឹងការអនុវត្តន៍ច្បាប់ចរាចរណ៍ផ្លូវគោក និងគ្រប់គ្រងសម្ភារៈរថយន្ត របស់នគរបាលដែលមានស្លាកលេខនគរបាលឱ្យបានល្អ ៣-ពង្រឹងទប់ស្កាត់ ការពារសន្តិសុខ នៅតាមបន្ទាត់ព្រំដែន ៤-បង្កា បង្ក្រាប គ្រប់បទល្មើសព្រហ្មទណ្ឌ ដើម្បីធានាបាននូវសន្តិសុខសណ្តាប់ធ្នាប់សុវត្ថិភាពសង្គម ៥-ពង្រឹងបន្ថែមនូវ ភូមិឃុំមានសុវត្ថិភាព បម្រើសេវាសាធារណៈជូនបងប្អូនប្រជាពលរដ្ឋបានល្អជានិច្ច ត្រៀមសម្ភារៈ មធ្យោបាយ ឧបករណ៍ ដើម្បីចេញអន្តរាគមន៍ ២៤ម៉ោងលើ២៤ម៉ោងបានទាន់ពេលវេលាក្នុងហេតុការណាមួយ ៦-កម្លាំងទាំងអស់ត្រូវគោរពវិន័យ និងមានសាមគ្គីភាពផ្ទៃក្នុងឲ្យបានល្អ៕
